انا قاعد في اوضتي و بتفرج على التليفزيون او على الانتر نت و اللي بيحصل في البلد او في العالم كله بشكل عام قررت ابعت جواب للاله ايا كان دينه او مسمياته بس فيه واحد بيدير الكون و يعلم كل شئ زي ما بيقولوا اللي مصدقين في ” وجود اله “
كتبت ليه كده
صاحب العزة الالهيه
تحية طيبة و بعد ،
اقدم لك تحياتي في اي مكان انت فيه ولو اني لست اعلم هذا المكان جيدا لاني لست مدرك انت من او اين تكون لاني لا ارى اي اله يناسبني فيما اراه ممن يتبعوك
اريد ان اخبرك بما يحدث في الأرض لست عالم اذا كنت تعلم و تارك الامور ام لست عالم
اتعلم اني اشك في وجودك .. اتعلم اني ارك تفرق بين الناس باسمك فكل مجموعة تتبعك تنعزل عن الباقيين .. اتعلم ان هناك من يقتل لانك امرتهم .. اريد ان اخبرك ان الناس متحيرة فيمن هو انت .. لماذا انت متعالي هكذا على خلقك ..
لا اريد ان اطيل عليك و للحديث بقية …
امضاء
مجموعة من بني آدم
وقعدت افكر لو انا مكان الاله دا و بحسب الموصفات اللي في دماغي عن الاله دا او لو باختار اله من ضمن الاله كتير حوليا … اكيد كلهم مزيفين ماعدا واحد بس اللي صح .. بس لو انا مكان الاله دا ايه الجواب اللي ممكن يبعتوا و يرضني كانسان او على الاقل يديني مفتاح او خيط اكمل بيه في الطريق الصح …
اخيرا وليس آخرا لاقيت جواب ..
اعزائي البشر ..
مبسوط جدا انكم بعتوا جواب وكمان حلوة اللغة الفورمال اللي انتوا كتبتوا بيها .. بس عاوز اقولكم حاجة .. انا مش بيفرق معايا اللغة المهم انه الكلام من جوة .. فمتصعبوش الدنيا او لو اللي فهموكم انه فيه لغة عندي افضل من لغة .. فهموكم غلط ياما هما حسابتهم غلط او لازالوا غير مدركين انه ما يهمنى القلب لا اللسان .. المهم كنت اتمنى ان اكتب اليكم في ظروف افضل من دي ، بعيد عن الدمار و القتل اللي بيحصل بينكم ، او الخسائر اللي بتحصل بسبب مشاكل البيئة اللي انتوا عايشيين فيها و لكن لاقيت انه دا الوقت المناسب اني ارد عليكم بالكلمات دي
انا حبيتكم من اللحظة اللي شفت فيها الحياة بتجري فيكم ، و قد ايه كنت مبسوط لما شفت انكم تشبهوني كتير بعد ما حطيط من نفسي كتير فيكم .. اينعم هى الامور مشيت مش افضل حاجة و دا اللي فرقنا عن بعض و اللي نتيجته هو اللي انتوا بتعملوه في بعض حاليا .. انا عارف انه كتير منكم مش مصدق بوجودي و فيه ناس تانية بتصدق و فيه ناس محتاره لغاية دلوقتي فيا ، بس انا تركت ليكم مطلق الحرية في اختيار موقفكم اتجاهي ، مش لانه عاوز البشر تتوه بس اللي عاوز يوصل ليا فعلا صاحب حق و مخلص للمعرفة هيوصل … عامة دا لا كان ولا هيكون بيخليني اميز بينكم و بين بعض ايا كان نظرتهم ليا .. الشمس هتطلع على كل الناس و خير الارض هيطلع لكل الناس من غير تمييز تماما ، لاني ببساطة انا اللي خالقكم كلكم و انتم متساويين قدامي و نظرتي ليكم انكم ” الانسان ” ، التمييز دا اللي حطتوه انتم و للاسف نسبتوه ليا و انا مش كده ، و انا بسأل اذا كنت انا مش بمييز : ليه انتم فضلتم اللي بيصدق في وجودي على اللي مش بيصدق ؟؟!! ، و بأي حق اصلا تمييزوا بين الرجل و المرأة ؟؟!! و تخلي الرجل اعلى من المرأة باسمي !! و على اي اساس بنتظر بقرف لاخيك الانسان الفقير ؟؟
عارفين ؟ .. انا فكرت كويس اوي قبل ما اكتب الرسالة دي و ارد عليكم لاني عارف اني اسمي اتشوه بسبب الناس اللي ادعوا انهم مرسليين من عندي و قالوا كلام كان كل هدفهم فيه هو انهم يحققوا طموحهم و رغباتهم و شهواتهم و مكاسبهم على حساب تشويه اسمي ، عشان كده من فضلكم متندهوش ولا تصلوا بالاسم اللي بيه بيعملوا الشر او يقتلوا الانسانية بيه او بيحققوا مكاسبهم بيه ، انتوا ممكن تقولوا ليا اي اسم انتوا شايفين انه مناسب لي ، عشان انا هو انا مش بتغير ولا لو ندتوني باي اسم ، محبتي ليكم ثابته مش بتتغير لاني احب الانسان فمهما فعل هو انسان ، لكن يهمني اني اشوف نفسي فيكم عشان ترجعوا زي ما خلقتكم قبل كده
في نهاية الرسالة احب اقولكم اني انا مش بعيد عنكم ، لكني قريب جدا ليكم اقرب من نفسكم ، هتلاقوني اول ما تطلبوني بجد ، و هتشفوني لو دورتوا كويس بقلوبكم و افكاركم ، انا دايما بخبط على ابواب القلوب و الفكر ، لو عاوزني هكون ليكم ، لو مش عاوزني همشي بكل هدوء لانه دي حياتكم و انا مش بقتحم ولا برغم ارادة حد انه يقبلني لاني ببساطه انا اللي خلقت الحرية فيكم و انا بحترمها
متنسوش اني بحبكم ، و باتمني انكم تقبلوني كاب و اني ادعوكم ابناء .. مش اكتر من كده
امضاء
الاله اللي دايما بيحبكم و يقدركم
ملحوظة : ممكن بعد كده تنادوني باسماء زي الخير او النور او الحق او الحب او العقل … اي حاجة انتم تحبوها
