عشر عادات تستنزف يومي

ايه اللي بيخليني مش طايق نفسي .. ولا طايق اللي حوليا ..

مش مركز .. ولا عندي طاقة اعمل بيها اللي عليا .. واحساس الحمل اللي بيتقل دايما فوق كتافي وعايش بيه ..

ومع التركيز والقاعدة .. ومراجعة بسيطة ليومي ولنفسي .. طلعت بعشر عادات بعملهم .. وانا مش واخد بالي ..

1- التفكير الزيادة .. ينفع تفكر في اوقات زيادة .. لكن مش طول الوقت ..

2- انك تاخد كل الامور بشكل شخصي .. ينفع تطنش حاجات .. وفيه حاجات مش مقصودة ..

3- المبالغة في الاجهاد .. ماتحولش تجهد نفسك في حاجة زيادة عن اللزوم .. ينفع تريح .. ينفع تسيب اوقات تهدى كده وتفضي نفسك ودماغك ..

4- شحن النفس بصور .. يعني ماتعش دور الضحية .. وماتقعدش ترسم سيناريوهات في دماغك .. وماتتفرجش على دراما كتير وتتخيل نفسك جواها .. دا ممكن يخليك تقفل اصلا من الناس اللي حواليك وهم معملوش حاجة .. ينفع تنبسط وتعيش الواقع بتاعك ..

5- محاولة ارضاء الجميع .. ماتحولش تعملها لانها مش بس بتستنزف طاقة .. دي بتقتل بشكل سريع ومباشر .. وفي وقت قليل .. وفي الاخر مبتحصلش …

6- التغذية السيئة والنوم القليل .. حاجة زي كده ممكن تخلي الواحد طاقته تقل .. مش مركز .. ينفع تاكل .. وتاكل كويس .. وتهتم بجسدك .. وتنام كويس وتدي جسمك حقه في الراحة علشان جسدك يحترمك …

7- ماتفكرش كتير في الماضي .. الماضي كويس نفتكره من وقت للتاني .. بس مينفعش تفضل عايش فيه ..

8- القاعدة الكتير على السوشيال ميديا .. ودا تقريبا بياكل وقت اكتر من ٢٠ % من يومي .. والمحصلة .. صفر .. ينفع اقعد على السوشيال ميديا .. بس اقلل شوية .. وانقي اللي بتفرج عليه ..

9- سيبك من مين قال ايه عليك .. او مين بيقول ايه على مين .. النوع دا من الاحاديث مجهد بشكل مش طبيعي .. وبيدخلك في رحلة من السيناريوهات والدراما غير طبيعية .. فبيخلي تركيزك يروح كله ناحية دا .. وتدور على مين قال ايه في السوشيال ميديا .. وطاقتك كلها تستنزف .. فا ..فكك…

اخر حاجة..

10- عدم الاستمتاع .. انك تعمل حاجة وانت مش مستمتع .. بتبقى تقيلة .. الحماس بيجي من انه فيه حاجة في اللي بتعمله لما هتوصلها هاتنبسط وتستمتع .. ودا اللي بيخلي عندك طاقة .. ومستعد ماتنمش .. وتبذل مجهود وانت مش حاسس .. ومستعد تعيد 100 مرة علشان يطلع الموضوع كويس .. الطاقة بتفقد .. لما ميبقاش فيه مغامرة ..

اخلق لحظات في وسط الحياة اللي تبان انها مملة .. لحظات تستمتع فيها .. وتشحنك طاقة..