احيانا كتيرة اوي بتشعر بالذنب الشديد كل ما تفتكر حاجة وحشة عملتها و جرحت بيها نفسك او الناس اللي حوليك ..

و تحس بالالم لانك ماقدرتش توصلهم اللي جوواك صح .. خصوصا لو انت بتعزهم ..
و كل يوم بيزيد الاحساس دا جواك لدرجة مش قادر فيها انك تعيش ..
و ممكن يوصل الشعور بالذنب  مش بس للانتحار الجسدي .. لكن الانتحار النفسي و الروحي …

حاجات كتيرة بتموت جواك .. و بتتغير في حاجات كتيرة ..  و بتحس بمرارة طول الوقت ..
ضميرك مش مرتاح علطول …
بتحس بكده ..
الحلول كتيرة بس الاساس واحد ..
و دي مباديء ناحية انك تاخد خطوات ناحيه علاج الشعور دا ..

اولا :
لازم علشان ترتاح تفهم انه الاخطاء اللي ارتكبتها مش انت الوحيد اللي قمت بيها .. فيه ناس تاني كتير في كل مكان عملت اخطاء كتيرة زيك ..

ثانيا : الحب علاج .. لازم تقبل نفسك .. لازم تشوف حب ربنا ليك حتى لو انت رافض نفسك و مش قابلها و مش محترمها .. لازم تدرك انك مهما عملت انت قيمتك ثابته .. الحب مش متوقف على حالتك و لكن على انك في كيانك غالي جدا … و انه اخطائك جزء من خطة تعليمك في الحياه .. و انه دفع التمن الاخطاء دي جزء مهم علشان تعرف تتعلم .. مش مجرد نوع من انواع الزل ..

ثالثاً : عليك انك تقنع نفسك بعد مراجعة اخطائك انه انت اتصرفت بالطريقة دي في المواقف دي بحسب الوعي و الفهم اللي كان عندك لحظتها … و النهاردة انت اتغيرت و على اساسها هاتتغير طريقة تفكيرك و ردود افعالك … و  افهم الحاجات اللي فيها مشكلة جواك اللي خلتك تتصرف كده و عالجها ..

رابعا : عليك انك تسامح نفسك بالكامل على كل أخطائك  وتسامح نفسك انك معرفتش تدي الحب الكافي لنفسك و لا حتى للأشخاص اللي بتحبهم …