في الجزئين الأول والثاني كنا بنناقش الدوافع والحاجات اللي هتقابلهم عند اختيارك طريق القيادة. وهنكمل في آخر جزء في الموضوع عن ادوات لقيادة الفرق .
صدق ولا لا، فيه دراسات كتير بتقول إن السبب الرئيسي اللي بيخلي الموظفين يسيبوا شغلهم مش الفلوس ولا الشغل نفسه، وإنما العلاقة بينهم وبين المدير! يعني لو المدير بعيد عن فريقه ومحسسهم إنهم لوحديهم، يبقى هيروحوا يدوروا على مكان تاني يحسوا فيه بالاهتمام والتقدير.
بس متقلقش! في 3 حاجات بسيطة تقدر تعملها عشان تبني علاقة قوية مع فريقك وتخليهم يحبوا الشغل وياك.
1. قول رأيك في اللي بيعملوه:
كل واحد فينا بيحب يسمع رأي الناس فيه، وفريقك مش مختلفين عن باقي الناس . أسألهم دايما “عامل ايه في الشغل؟” و”فريق العمل شايف ايه ؟” لو عارف إنهم بيشتغلوا كويس، قولهم قدام الناس وبشوية تفصيل عشان يحسوا بقيمتهم. ومهم كمان لما تشوف حد منهم بيقدم شغل كويس، تقدر تقول قدام الكل عشان الكل ياخد حافز. الكلام الحلو بيخلي الافراد يستمروا في العطاء.
2. حرية.. بس مش على كيفك!
لو الشخص عارف إن شغله كويس ويقدر يعمله كويس، يبقى عاوز يعرف كمان ايه حدوده. خلي الفريق يعرفوا إن عندهم مساحة عشان يفكروا ويجربوا حاجات جديدة، بس في نفس الوقت لازم يعرفوا كمان إن في حاجات لازم يستأذنوك عليها. خلي الموضوع واضح ومش مشوش عشان الكل يقدر يشتغل براحة.كمان فيه حدود في حاجات كتيرة لازم تحكمهم زي الرؤية ، الهدف ، الاستراتيجيات ، حدود العلاقات وشكلها.
3. خليهم يشاركوا:
لو اتبعت الخطوتين الأولانيين، هتلاقي إن الحوار بينك وبين فريقك بيقوى أكتر. هتبدأ تكتشف إن في ناس عندهم أفكار وآراء كويسة تقدر تفيد الشغل. خليهم يشاركوا ويدوا آراء في تحسين طريقة العمل أو أفكار لمشاريع جديدة. كل ما تحس إن رأيهم مهم، كل ما هيحسوا بقيمتهم ويزيد إنتاجهم.
دي 3 حاجات بسيطة تقدر تعملها عشان تبني فريق قوي ومتماسك. استثمر في فريقك وخليهم يحسوا بقيمتهم، هتلاقي إنك كسبت فريق قوي وشغل أحسن كتير.
